Халыҡтар берҙәмлеге көнө менән!

4 ноябрь – Рәсәйҙә 2005 йылдан алып Халыҡтар берҙәмлеге көнө булараҡ билдәләнә. Был көндөң тарихы тәрәндә ята: 1612 йылда Минин менән Пожарскийҙың яугирҙары Рәсәйҙе сит ил баҫҡынсыларынан азат итеүенә арналған был байрам ауыр саҡта бер-береһенә ярҙамға килгән халыҡтарҙың дуҫлығына, теләктәшлегенә, яуҙа – ышаныслы яуҙашлығына арнала. 

Быйылғы байрам уңайынан Башҡортостан Республикаһының Һуҡырҙар өсөн махсус китапханаһы Ингуш республикаһының Ямалетдин Йәндиев исемендәге милли китапханаһына бүләккә бер-нисә китап әҙерләне. Был китаптар араһына Башҡортостанда йәшәүсе халыҡтарҙың милли үҙенсәлектәрен сағылдырған әсбаптар, башҡорт яҙыусылары әҫәрҙәре йыйынтыҡтары һуҡырҙар һәм насар күреүселәр уҡый ала торған: ҡағыҙҙа – Брайль ысулы менән, дисктарҙа – төрлө телдәрҙә “һөйләй” торған китап форматтарында әҙерләнде.