Мәҙәниәт учреждениеларында уңайлы мөхит булдырыу буйынса профессиональ практикум - беренсе көн

29 октябрь «Торатау» Конгресс-холында инклюзияны үҫтереүгә һәм Башҡортостан республикаһының мәҙәниәт һәм сәнғәт учреждениеларында һаулыҡ мөмкинлектәре сикләнгән кешеләр өсөн уңайлы мөхит булдырыуға йүнәлтелгән профессиональ практикум старт алды.
Беренсе көн программаһында мәҙәниәт һәм социаль эш өлкәһендәге алдынғы белгестәрҙең лекциялары үтте. М. Х. Төхвәтшин исемендәге һуҡырҙар өсөн Башҡортостан республика махсус китапхана директоры вазифаһын башҡарыусы Ирина Күсәрбаева инклюзив мәҙәни киңлек булдырыуға заманса ҡараштар, шулай уҡ был өлкәләге ҡануниәт тураһында һөйләне.
Ҡатнашыусылар алдында онлайн форматта Свердловск өлкә һуҡырҙар һәм насар күреүселәр өсөн махсус китапхана белгестәре сығыш яһаны. Директор урынбаҫары Виктория Арсентьева күреү һәләте боҙолған кешеләр менән эшләү тәжрибәһе менән уртаҡлашты. Адаптив уҡыу үҙәге мөдире Марина Сырбу инклюзив коллективты формалаштырыуға айырыуса иғтибар бүлде.
Музей киңлегендә инклюзия темаһын Башҡортостан Республика милли музейының археология бүлеге мөдире Рида Русланова асты.
Шулай уҡ ҡатнашыусыларға «Аҡтырнаҡ» эт-оҙатыусылар клубы эше тәҡдим ителде. Клуб етәксеһе Гүзәл Хәсәнова еңел атлет, Европа чемпионы Алина Сәмиғуллина һәм уның лабрадоры Гарри менән бергә юл күрһәтеүсе эттәрҙең мөһимлеге хаҡында һөйләне.
Лекция бүлегенән һуң ҡатнашыусылар Башҡортостандың этнологик тикшеренеүҙәр Институтының археология һәм этнография музейында һәм «Рәсәй — минең тарихым» тарихи паркында булды.
Практикум тәжрибә уртаҡлашыу һәм мөмкинлектәре сикләнгән кешеләр менән һөҙөмтәле эшләүгә һәм уңайлы мөхит булдырыуға йүнәлтелгән мәҙәниәт учреждениелары хеҙмәткәрҙәренең һөнәри күнекмәләрен үҫтереү өсөн яңы мөмкинлектәр аса.