Һуҡырҙар өсөн «Башҡортостан - геройҙар иле» мемориаль үҙәге булдырылды

26 ноябрь һуҡырҙар өсөн башҡорт китапханаһында әҙәби-музыкаль программа үтте. Унда һуҡырҙар өсөн «Башҡортостан - геройҙар иле» тарихи-мемориаль үҙәген булдырыу буйынса грант проектына йомғаҡ яһалды. Рәсәй Федерацияһы Президентының мәҙәниәт һәм сәнғәт өлкәһендә дөйөм милли әһәмиәттәге ижади проекттарға ярҙам итеү өсөн грантын махсус китапхана 2024 йылда алғайны.

Башҡортостан республикаһы мәҙәниәт министрлығының социомәҙәни эшмәкәрлек бүлеге башлығы Илнур Вәлиев ҡунаҡтарҙы сәләмләү һүҙендә "китапхана йыл һайын төрлө республика һәм бөтә Рәсәй грант конкурстарында ҡатнаша, төрлө эшмәкәрлек өсөн бюджеттан тыш аҡса йәлеп итә", тип билдәләп үтте. Башҡортостан Республикаһы Башлығы Радий Хәбиров иғлан иткән "Һаулыҡ мөмкинлектәре сикләнгән кешеләр хаҡында хәстәрлек күреү" йылында был эшмәкәрлек айырыуса мөһим. Үҙ халҡыңа ҡарау тойғоһон формалаштырыу, йолаларҙы һәм тарихты һаҡлау, тыуған илгә һәм уның күп милләтле халҡына  һөйөү тәрбиәләү - илебеҙҙең беренсе урында торған стратегик мөһим бурысы.
Проектты тормошҡа ашырыу сиктәрендә, хәрби-патриотик йүнәлештәге мемориаль музейҙарға сығыу, Башҡортостан республикаһы геройҙары һәйкәлдәренә экскурсиялар һәм походтар үткәрелде. Өфөнөң 28-се махсус коррекция дөйөм белем биреү мәктәп-интернаты уҡыусылары һәм Өфө медицина колледжы студенттары Ҡырмыҫҡалы районы Шайморатов ауыл мәҙәниәт йортонда урынлашҡан Миңлеғәле Шайморатов исемендәге күргәҙмә залында һәм Салауат районы Малаяҙ ауылында урынлашҡан Салауат Юлаев исемендәге музейҙа булдылар. Бөтә экскурсиялар туранан-тура тифлокомментарийҙар һәм яраҡлаштырылған тактиль экспонаттар менән оҙатылған.
Өфө медицина колледжында мемориаль саралар үтте. «Геройҙар булып тыумайҙар, геройҙар булып китәләр»хәтер сәғәте «Ватанды һаҡлаусылар» дәүләт фондының БР буйынса филиалы вәкиле һәм МХО хәрәкәте ҡатнашыусыһы менән берлектә уҙғарылды. Китапханасылар тыңлаусыларға Салауат Юлаев заманында һәм беҙҙең көндәргә тиклем тыуған ерен үҙ исемдәре менән данлаған Башҡортостандың данлы улдары һәм ҡыҙҙары хаҡында һөйләне.
 «Башҡортостан Бөйөк Ватан һуғышы йылдарында» хәтер сәғәте Ватанды һаҡлауҙа һәләк булғандарҙың иҫтәлеген мәңгеләштереү буйынса «Эҙләнеү» дөйөм Рәсәй йәмәғәт хәрәкәте командиры Елена Вязовцева студенттарҙы тыл хеҙмәткәрҙәренең батырлығы, Өфөгә эвакуацияланған предприятиеларҙың эше менән таныштырҙы. Өфөнөң 28-се махсус коррекцион дөйөм белем биреү мәктәп-интернатында "Аҡ торналар" көнөнә арналған мемориаль лекторий үтте.
Проектты тормошҡа ашырыу барышында махсус китапханала һуҡырҙар өсөн даими эшләгән «Башҡортостан - геройҙар иле» мемориаль үҙәге булдырылды. Унда Башҡортостандың 10 геройына барельеф урынлаштырылды.
Уҡыусылар һәм үҙәккә килеүселәр, күреү һәләте буйынса инвалидтар өсөн Махсус китапхананың тауыш яҙҙырыу студияһында профессиональ дикторҙар яҙҙырған, Башҡортостан геройҙарының биографияһын үҙ эсенә алған аудио йыйынтыҡ сығарылды. Шулай уҡ, актуаль тематика буйынса ҡабарынҡы-график һүрәттәр менән йыһазландырылған әсбап нәшер ителде.
-Тарих - үҫеп килеүсе быуынды патриотик тәрбиәләүҙең, үҙ халҡы һәм иле өсөн ғорурлыҡ тойғоһон индереүҙең, быуындар күсәгилешлеге өсөн шарттар булдырыуҙың ҡеүәтле ҡоралы. Йәштәрҙең тыуған ҡалаһы, республикаһы, иле тураһында белеме етешмәй. Шул уҡ ваҡытта һәр төбәктә тыуған яҡ халҡының батырлыҡтары өлгөһө бар. Ҡыҙғанысҡа ҡаршы, төбәктең, илдең тарихына дөйөм ҡыҙыҡтырыу уятыуҙа традицион ысулдар ҡулланыу һуҡырҙар өсөн һәр ваҡыт асыҡ түгел. Мемориаль үҙәк һуҡыр йәштәргә Башҡортостан Республикаһының билдәле шәхестәре менән яҡынданыраҡ танышырға мөмкинлек бирәсәк, – тип аңлатты Мәкәрим Хөсәйен улы Төхвәтшин исемендәге һуҡырҙар өсөн Башҡортостан Республика махсус китапханаһы директоры Ирина Күсәрбаева.
 
#ГРАНТПРЕЗИДЕНТАРОССИЯ #ГРАНТБРСБС