Артем Новоселов. “Был минең ҡалам” күргәҙмәһе

18 март  һуҡырҙар өсөн Башҡортостан республика махсус китапханаһында, йәш рәссам Артем Новоселовтың “Был минең ҡалам” исемле күргәҙмәһе асыла. Экспозицияла 30 ижад эше тәҡдим ителә.

Артем Новоселов 1994 йылда Өфө ҡалаһында донъяға килә. А.А. Кузнецов ис. 1-се художество гимназияһында уҡый, әрме сафтары алдынан, Өфөнөң сәнғәт училищеһына уҡырға инә. РБ-ның Халыҡ рәссамы, уҡытыусы  Г. Г. Калитовта белем ала.

Тәүге “Кәйеф” тип аталған күргәҙмәһен В. И. Ленин ис. Йорт-музейҙа үткәрә. Бөгөнгө көндә Артем Йәш рәссамдар ойошмаһының ағзаһы.

 Үҙ эштәренә автор тыуған ҡалаһына, тәбиғәткә, ғөмүмән, тормошҡа булған сикһеҙ һөйөүен һалған. Һүрәттәрҙең буяуҙары үҙенсәлекле, яҡты, бай йөкмәткеле.

“Тыуған ҡаланың һауаһы һәр ваҡыт үҙенсәлекле. Унда төп урамдарҙың ритмы, ҡала ситендәге йорттарҙың йоҡомһорауы, йыл миҙгелдәренең алышыныуы тойола. Барыһы ла шул тиклем таныш һәм үҙгәреүсән. Бер-нисә тапҡыр бер үк урындан үтергә була, әммә шул уҡ урында һәр ваҡыт башҡа төрлө буласаҡ” , - тей Артем.

Күргәҙмә 15:00 сәғәттә асыла. Шәмбе көнөнән тыш, 09:00 алып 18:00 тиклем, Өфө ҡалаһы, Киров урамы, 47 адресы буйынса эшләй. “Витамин заводы” туҡталышына тиклем төрлө транспорт төрҙәре бара.