20 ноябрҙә Башҡортостан ресспубликаһының Һуҡырҙар махсус китапханаһында һауыҡтырыу өсөн кәрәкле техник ҡорамалдар, ишетеү һәм күреү мөмкинлеге сикләнгән кешеләргә уңайлы мөхит булдырыу ҡорамалдары күргәҙмәһе үтте.

Күргәҙмәне Бөтә Рәсәй һуҡырҙар йәмғиәтенең Башҡортостан бүлексәһе идараһы рәйесе Юрий Акшенцов асты. Техник сараларҙы асыу тантанаһында шулай уҡ БР Хеҙмәт һәм халыҡты социаль яҡлау министрлығының инвалидтар менән эшләү бүлеге начальнигы Нурия Сәлихова, “Техник реабилитация саралары һәм санаторий-курорт путевкалары менән тәьмин итеү буйынса республика үҙәге” Дәүләт ҡаҙна учреждениеһы директоры Зөлфирә Масҡолова, Башҡортостан Республикаһының социаль страховкалау фондының страховка взностарын ойоштороу бүлексәһе начальнигы Әлфиә Аҡъегетова ҡатнашты.

Бөтә Рәсәй һуҡырҙар йәмғиәтенең “Логосвос” нәшриәт-полиграфия тифломәғлүмәт комплексы яуаплылығы сикләнгән йәмғиәте вәкиле Сергей Захаров үҙ сығышында бындай техник саралаҙы етештереүҙең әһәмиәтен билдәләп үтте, уларҙы етештереүсе бер-нисә ойошма менән дә таныштырҙы.

Екатеринбург ҡалаһының “Круст” яуаплылығы сикләнгән йәмғиәтенең күреү һәм ишетеү мөмкинлектәре сикләнгән граждандар өсөн тәғәйенләнгән продукцияһы тураһында Вячеслав Порывкин телмәр тотто. Үҙенең презентацияһында мохтаждар өсөн ҡаршылыҡһыҙ, уңайлы мөхит булдырыу – бөтөн үҫешкән йәмғиәттең төп бурыстарының береһе, ә дәүләттең социаль сәйәсәтенең – төп йүнәлеше булырға тейешлеген һыҙыҡ өҫтөнә алды. Ул шулай уҡ үҙҙәренең йәмғиәте тәҡдим иткән Уңайлы ҡала системаһы тураһында ла һөйләп үтте. Был система ҡалала йәмәғәт транспортының һәм инфраструктураларҙың уңайлылығын тәьмин итеү өсөн булдырылған. Уға абонент ҡорамалдары, мәғлүмәт биреүсе ҡорамалдар, хеҙмәткәрҙәрҙе саҡырыу төймәләре, уларға төрлө мәғлүмәтте хәбәр итеү яйламалары, һәм башҡалар инә. Уңайлы ҡала системаһы күреү һәм ишетеү мөмкинлектәре сикләнгән кешеләр юлында әле булһа йыш осраған ҡаршылыҡтарҙы еңеү юлдарын тәҡдим итә.

Күңгәҙмә барышында тағы ла төрлө-төрлө техник реабилитация саралары күрһәтелде.

Бөтә Рәсәй һуҡырҙар йәмғиәте асыҡ акционерҙар йәмғиәтенең Башҡортостандағы бүлексәһе һәм Башҡортостан Республикаһының Һуҡырҙар махсус китапханаһы Һеҙҙе ишетеү, күреү мөмкинлектәре сикләнгән кешеләр өсөн реабилитация техник саралары, уңайлы мөхит булдырыу саралары менән танышырға күргәҙмә-презентацияға саҡыра. Сара 2014 йылдың 20 ноябрендә һуҡырҙар махсус китапханаһында уҙасаҡ. Адресы: Өфө ҡалаһы, Киров урамы, 47-се һанлы йорт. "Витамин заводы" туҡталышы.
Күргәҙмәнең эш ваҡыты 10.00 сәғәттән 18.00 сәғәткә тиклем.

2014 йылдың 12 ноябрендә Башҡортостан республикаһының һуҡырҙар өсөн махсус китапханаһында 128-се мәктәптең 2 класс уҡыусылары өсөн Халыҡ-ара һуҡырҙар көнөнә арналған «Йөрәк менән ҡағыл» исемле түҙемлек дәресе үтте.
Китапханала үткән экскурсия барышында балалар китапхананың фонды менән танышты, рельефлы-һүрәтле Брайль шрифты менән китап баҫыу эшен күҙәтте. Балалар шулай уҡ «Маша һәм айыу» тифлокомментариялы йәнһүрәтен бик ҡыҙыҡһынып ҡараны. Был экскурсия уларға нисек тәьҫир итеүе һәм ниндәй тойғолар ҡалдырыуы тураһында китапхана белгестәре менән фекер алышты. 
Уҡыусылар балалар яҙыусыһы, «Балалар әҙәбиәте антологияһы»ның төҙөүсеһе һәм авторы Фәрзәнә Ғөбәҙуллина менән дә танышты. Ул балаларға антологияға ингән әҫәрҙәр тураһында һөйләп бирҙе.
Һуҡырҙар өсөн махсус китапханала үткәрелгән түҙемлек дәресенең аҙағында уҡыусылар тауыш яҙҙырыу студияһында китаптар тураһында дискка шиғыр яҙҙырҙы. Был дискты улар китапханаға бүләк итеп ҡалдырырға ҡарар итте.

2014 йылдың 11 ноябрендә Башҡортостан республикаһының һуҡырҙар махсус китапханаһында «Башҡортостан Республикаһының 2010-2014 йылдарҙа китапханасы хеҙмәтен уҫтереү» маҡсатлы программаһын тормошҡа ашырыу өсөн «Китапхана – толерантлыҡ һәм мәҙәниәттәр берҙәмлеге үҙәге» исемле республика семинары үтәсәк.

Семинарҙың барышында мәҙәни үҙәктәрҙең роле тураһында, республикала йәшәгән халыҡтың мәҙәни үҫеше һәм  күсәгилешлелеге; кешеләр менән эшләүҙә ижтимағи-мәҙәни реабилитациялау аспекты; хәҙерге шарттарҙа китапханаларҙың эш тәжрибәләре тураһында фекер алышыу буласаҡ.

Семинарҙа Башҡортостан Республикаһының төрлө ҡалаларының һәм райондарының директорҙары, директор урынбаҫарҙары, китапханаларҙың белгестәре ҡатнашасаҡ.

Семинарҙа ҡатнашыусыларҙың иғтибарына группалар менән экскурсиялар, китапхананың эшмәкәрлеге тураһындағы видеофильм тәҡдим ителәсәк.

Сара сәғәт 10:00 башлана.

Беҙҙең адрес: Өфө ҡалаһы, Кирова урамы, 47 һанлы йорт, “Витамин заводы” туҡталышы.

Башҡортостан Республикаһының һуҡырҙар өсөн махсус китапханаһы бүләккә “Рәсәй халыҡтары әкиәттәре”, балалар өсөн китаптар алды, был китаптар Хабаровск крайының һуҡырҙар өсөн махсуслаштырылған китапхана базаһында нәшер ителгән. Был китаптар 2014 йылда Рәсәй Федерацияһының Президентының грантын алған «Усымда Рәсәй халыҡтарының әкиәтле мозаикаһы: күреү һәләттәре сикләнгән балалар өсөн күп форматлы баҫмалар» проекты сиктәрендә нәшер ителгән.

Күп форматлы баҫмалар һуҡырҙар өсөн эре нөктәле Брайль шрифы һәм график һүрәттәр менән баҫылған, эре шрифтлы китаптар һәм CD-дискта китаптың аудио вариантында күрһәтелгән.

2014 йылдың 15 октябрендә, Халыҡ-ара аҡ таяҡ көнөндә, Башҡортостан республикаһының Һуҡырҙар махсус китапханаһында йәмәғәтселек иғтибарын һуҡырҙар проблемаһына йәлеп итеү саралары башлана. 
Ай буйына барасаҡ саралар исемлеген Башҡортостандың халыҡ шағиры Мостай Кәримдең тыуыуына 95 йыллығына арналған кисә аса. Хәтер кисәһе Нефтекама балалар һәм үҫмерҙәр үҙәк китапханаһы уҡыусылары менән онлайн режимда әңгәмә форматында үтәсәк. Әңгәмәлә китапхана уҡыусылары – Башҡортостан республикаһының атҡаҙанған мәҙәниәт эшмәкәрҙәре, Башҡортостан Яҙыусылар берлеге ағзалары: балалар яҙыусыһы Фәрзәнә Ғөбәйҙуллина һәм сәйәхәтсе-яҙыусы Камил Йыһаншин ҡатнаша. Улар Мостай Кәрим тураһында хәтирәләре менән уртаҡлашмаҡсы.
Көндөң тәүге яртыһында беҙҙең китапхана хеҙмәткәрҙәре Өфө ҡалаһының 28-се интернат мәктәбе уҡыусылары менән тифлокомментарийлы фильм ҡарауҙа ҡатнашасаҡ. Был фильды ҡарағас, уҡыусылар уның йөкмәткеһе буйынса инша яҙасаҡ. 13 ноябргә, Халыҡ-ара һуҡырҙар көнөнә тиклем дауам итәсәк ошондай сараларыбыҙ ярҙамында беҙ йәмәғәтселек иғтибарын донъяның сағыулығын күрә алмаған кешеләр барлығына йүнәлтергә теләйбеҙ.

Ҡәҙерле уҡыусыларыбыҙ!

Етеп килгән Ҡорбан байрамы менән ҡотлап, һеҙгә һаулыҡ, бәрәкәт һәм уңыштар теләйбеҙ.

Байрам көндәрендә ҡыуаныстарың менән бүлешеү, туғандарың, дуҫтарың, таныштарың менән бүләк өләшеү ғәҙәте һәр халыҡ вәкиленә лә хас. Былтыр Башҡортостан Республикаһы Диниә назараты Һуҡырҙар өсөн Республика махсус китапханаһына Ислам тәғлимәте менән таныштырусы бер-нисә китап бүләк иткәйне.

 

Йыйынтыҡҡа XIX быуаттан алып, XX быуат башына тиклем яҙылған хеҙмәттәр ингән. Башҡорт ғалимы, тел белгесе, теолог, төркиәтсе, яҙыусы, мәғрифәтсе Ризаитдин Фәхретдиновтың һәм башҡа авторҙарҙың хеҙмәттәре урын алған.

Баҫманың мөхәррирҙәре – М.Аҡмулла исемендәге БДПУ профессоры Т.М. Әминев, БР Диниә назараты мөфтөйө Н.М. Ниғмәтуллин һәм башҡа ғалимдар, дин белгестәре. 

Мосолман донъяһының бай мәҙәниәте тураһында бәйән иткән был китап киң ҡатлам уҡыусылар өсөн тәғәйенләнгән. Уны беҙҙең китапхана сайтындағы “һөйләшеүсе” электрон китаптар бүлегендә табырға була.